Incident sul lavôr vuê di matine tor des 7 a S. Vît al Tiliment, indulà che un operari al lavôr tal cantîr de gnove preson al è stât cjapât in plen dal braç de betoniere che si jere spacât di bot.
Su la fonde di une prime ricostruzion il braç mecanic che si dopre par gjetâ il ciment si sarès stacât de base de betoniere colant sul om che al à patît feridis grivis.
A dâ l’alarme a son stât i coleghis al lavôr in cantîr. Sul puest ambulance, auto mediche e l’elicotar, che al à cjapât tiere pôc lontan in vie Divisione Garibaldi. L’operari al à patît la roture scompueste di une gjambe e une vore di traumis al bacin. Daspò jessi stât stabilizât al è stât puartât in svol tal ospedâl di Udin.
Sul puest ancje i Vigjii dal fûc e i carabinîrs de Compagnie di Pordenon che, adun cul personâl ispetîf pe sigurece sui lûcs di lavôr, a àn inviât lis investigazions par sclarî lis causis dal incident. (a.d.g.) – 20.07.2026
