In ocasion de Zornade internazionâl de Femine, vinars ai 8 di Març, lavoradôrs e lavoradoris dai setôrs publics e privâts si astignaran dal lavôr, aderint ae mobilitazion convocade di tante part des siglis sindicâls autonomis. Fers par dute la zornade cuintri la violence e la disparitât di gjenar.
Il stop al podarès rivuardâ scuelis, trens, autostradis e vigjii dal fûc. Autostradis Alto Adriatico al informe che inte zornade di vinars il siopar dal compart autostradâl al è programât par dute la zornade tacant de miezegnot. Inte ocasion a saran garantîts dut câs i nivei minims di servizi public essenziâl e duncje la continuitât di chestis prestazions: centri radio informatîf, ausiliârs ae viabilitât, gjestion dai implants, manutenzion di urgjence.
Siopar ancje pai trens: il personâl al sarà fer de miezegnot aes 9 sore sere, ma a saran garantîts i servizis minims dal traspuart locâl intes fassis orariis di plui frecuentazion (des 6 aes 9 di buinore e des 6 aes 9 sore sere). Si fermaran scuelis e universitâts, tant che comunicât ancje dal Ministeri de Istruzion e dal Merit. Interessât dut il personâl dal compart istruzion e ricercje, cjapâts dentri docents universitaris e il personâl de formazion professionâl. Fer ancje il personâl aministratîf des Vuardiis dal Fûc, che si fermarà tra lis 8 di matine e lis 2 dopomisdì. (a.d.g.) – 04.03.2024
