Il brut timp al continue a bati il Friûl-Vignesie Julie. Ae ploie e aes temperaduris in sbassament, però, si è zontât ancje l’aiar fuart, cun svintulis di Buere che a Triest a àn rivât ancje ai 110 chilometris ae ore.
Tancj i intervents par risolvi i discomuts causâts de cjadude di ramaçs e arbui. In provincie di Udin il brut timp al à domandât l’intervent di diviersis scuadris dai Pompîrs e de Protezion civîl, tant che a Clausêt, Forgjarie, Rivis Darcjan, Faedis e Frisanc.
A Clausêt un arbul al è colât su la cjarezade presinte in localitât “Mulinars”, in vie della Val Cosa; a Forgjarie arbui a àn blocât la viabilitât inte zone de risierve dal Lât di Curnin, dilunc de “Strada di Bottecchia”; a Rivis Darcjan situazion simile cun arbui sfracassâts in vie Camin e che a àn ostruît in maniere parziâl la cjarezade, dopo diliberade di volontaris; a Faedis un arbul al è colât in zone industriâl. Altris intervents, infin, a son in cors ancje a Frisanc, simpri pe cjadude di plantis. (A.D.G.) – 16.05.2023
