Gnovis burascjadis a Grau vie pe gnot che a àn batût il lît, intant che al è pinsîr par une plene pussibile dal Lusinç a Gardiscje, tra cheste sere e doman di matine. E je la ex provincie di Gurize la aree che e vîf par cumò cun plui pinsîr il brut timp sul teritori regjonâl, cu la alerte meteo di colôr narancin tacade la gnot passade e previodude almancul fin aes 12 di doman. Ploie, nêf e aiar a son spietâts tra Friûl Ocidentâl e il Friûl de Alte, intant che il pericul di inagaments al interesse Friûl Centrâl, Basse Furlane e apont la zone di Gurize.
Su la cueste pericul di aghe alte e burascjadis, che a àn za batût il litorâl gradesan, cun erosion parziâl dal lît: “Il fenomen dut câs no si pues comparâ a chel regjistrât la Sierade passade” a fasin savê de Git. Si spiete par viodi cemût che e evolvarà la situazion dal Lusinç, in particolâr intun dai ponts plui critics, a Gardiscje: “La plene e je previodude tra usgnot e doman di matine – al conferme il vicesindic Alessandro Pagotto – ma ancjemò nol è clâr di cualis dimensions che e sarà: sperìn ben, o sin in contat costant cu la sale operative de Protezion Civîl”. (a.d.g.) – 23.02.2024
