A vadin indenant lis investigazions sul omicidi di Alessandro Venier, l’om di 35 agns copat e fat a tocs dentri de cjase indulà che al viveve cu la mari Lorena Venier, la compagne Mailyn Castro Monsalvo e la fie di sîs mês.
Lorena e à declarât ai investigadôrs die jessi stade je a fâ a tocs il cuarp dal fi dopo velu copât adun cu la compagne, doprant un seghet e linzûl par tignî il sanc.
Secont ce che e à contât la femine, Alessandro al è stât copât vie pe sere di vinars ai 25 di Lui: prime a àn cirût di indurmidîlu e dopo lu àn scjafoiât doprant leams pâr scarpis. Dopo il cuarp al è stat fat a tocs e metût dentri di un bidon dentri dal garage, indulà che al è stât cjatât joibe passade dai carabinîrs rivâts dopo de clamade fate di Mailyn. (a.d.g.) – 04.08.2025
