Omicidi a Gurize: ancjemò un misteri

A continuin lis investigazions sul omicidi di Gurize, in vie Garzarolli, dulà che domenie tor des 5 dopomisdì al è stât cjatât muart Walter Pappalettera, nassût intal 1981, inte rimesse de sô abitazion. Daûr des investigazions, l’om al sarès stât prime petât e po dopo batût plui voltis cuntun ogjet contundent. I agressôrs – che a podaressin jessi doi – no son stâts ancjemò identificâts. No saressin testemonis direts dal fat, scuviert par câs di un che al passave. Nol è di escludi che l’episodi si puedi ricondusi a un zîr di sostancis stupefacentis. Il stes sindic Rodolfo Ziberna al à confermât: “Al veve vût une vite travaiade e i servizis sociâi i levin daûr”. (A.I.) – 19.07.2022