Ombrenons e sdraiis sot secuestri su lis splazis libaris a Lignan

A Lignan a son stâts secuestrâts 91 tocs tra ombrenons, jetuts, cjadreis a sdraie e zûcs par fruts puartâts vie des fuarcis dal ordin. Al è il consuntîf de prime operazion di control des splazis libaris a Lignan di bande de polizie locâl e de cjapitanarie di puart. Come che al conte il comandant de polizie locâl Alessandro Bortolussi: “o vevin vût segnalazions de bande di fameis che in svariadis ocasions di matine adore a àn cjatât in splaze il spazi za ocupât di materiâi lassâts di altris bagnants”. La robe secuestrade e je disponibile li dal comant. I proprietaris legjitims a puedin duncje domandâ indaûr i lôr materiâi, ma a varan di paiâ la sanzion par abandon di ogjets, che e podarès partî di 100 euros. (A.D.G.) – 08.07.2022