Om intimpât cuintri man par 8 chilometris dilunc de autostrade A23

Al podeve causâ un incident une vore brut il furlan di 88 agns che vuê tor de 1.30 dopomisdì al à vuidât cu la sô auto in cuintri man par 8 chilometris dilunc de autostrade A23 Alpe Adria. Tor chê ore il centralin dal centri operatîf de Polizie stradâl di Udin al à tacât a ricevi cetantis telefonadis di int che e contave di une Opel Meriva che e coreve su la corsie di sorpàs, ma cuintri man.

I agjents a àn daurman blocât il trafic li dal confin in spiete che il vuidadôr al fos cjapât di une patulie partide di Damâr. In pôcs minûts la patulie e je rivade a fâ meti in bande la auto cun dentri l’anzian che al jere in stât confusionâl e i àn ritirade la patente: l’om al à cjapât ancje une multe fuarte. (a.d.g.) – 18.04.2024