I carabinîrs di Fontanefrede a àn puartat in preson, su ordin de Procure di Bergamo, un om di 57 agns origjinari di Salerno e domiciliât in provincie di Pordenon, che al varà di scontâ la pene di 5 agns e 9 mês pal reât di estorsion fat inte provincie lombarde tal Novembar dal 2017.
Une investigazion e veve scuviert che ciertis cooperativis che a lavoravin in provincie di Bergamo a vevin metût in pins un sisteme ilegâl fat di ricats e pressions cuintri di lavoradôrs forescj, soredut pakistans, par obleâju a firmâ verbâi di conciliazion cence che a podessin lei prime e capî ce che a firmavin, sot de menace di jessi mandâts vie o di no podê plui lavorâ pe cooperative. Altris lavoradôrs a àn scugnût firmâ chei verbâi cjapant fin a 300 euros, cu la rinunzie a domandâ il paiament dai straordenaris par dopo lavorâ fintremai a 12 oris in dì cence polsis. L’om al è stât puartât te preson di Pordenon. (a.d.g.) – 27.11.2025
