A son griviis lis cundizions dal om di 80 agns che vuê di matine, dongje de rotatorie di vie Zorutti a Rossêt di S. Zorç da la Richinvelde al è stât cjapât sot di une auto.
Il vieli, che al à patît un traume al cjâf e al toraç, al è stât socorût dal personâl dal 118 rivât sul puest cuntune auto mediche e une ambulance che lu à puartat daurman tal ospedâl di Pordenon. Sul puest ancje i carabinîrs dal Nucli Radiomobile di Spilimberc che a fasin lis investigazions.
Nie elicotar che al jere za in svol a Monfalcon par vie di un infortuni sul lavôr tal stabiliment de Fincantieri, indulà che un operari di 48 agns al è colat jù di une armadure e si è fat mal a cjâf e al ombul. L’operari al è stât puartât dal elicotar tal ospedâl di Udin in cundizions no griviis. (a.d.g.) – 27.08.2025
