Dopo misdì tormentât sabide passade a Comelians, indulà che un om al à cirût di scurtissâ une bariste e al à ferît invezit un client che le à difindude.
Il fat al è sucedût cuant che un om, forsit drogât, dopo vê menaçât la titulâr di un bar e ve barufât cui clients, al lât vie par tornâ pôc dopo cuntun curtis in man, di chei che si doprin par taiâ il pan e al à tacât a meti pôre ai clients. Un di lôr, di 60 agns al è intervignût par cirî di difindi la femine e al è restat ferît intune man. I carabinîrs che intant a jerin stâts clamâts a son rivâts che l’om di 37 agns al jere za lât vie, ma lu àn cjatât pôc lontan. In chê volte i militârs a àn vût il lôr ce fa parcè che l’om al à tacât a dâ cuintri ancje cun pugns e pidadis, ma a àn rivât a blocâlu e a meti lis manetis.
La percuisizion fate a cjase dal om e à permetût di secuestrâ il curtis di 37 centimetris e un pocje di marihuana. L’om al è stât arestât par violence e resistence cuintri di un public uficiâl e puart di ogjets bogns di ofindi par dopo jessi puartât te preson di Udin. (a.d.g.) – 30.03.2026
