No studii, no lavori, ma o vuei jessi mantignude. Ae fin, dopo dal tribunâl di Gurize e de Cort di apel di Triest, ancje la Cassazion e à dit vonde al assegn mensîl di 300 euros paiât ogni mês dal pari di une fantate di Gurize.
Pai judiçs, dopo dôs ufiertis di lavôr refudadis, la mancjade indipendence economiche e jere dome colpe sô. Protagoniste de vicende e je une zovine di 22 agns, fie di gjenitôrs separâts.
Dopo des scuelis superiôrs, il pari al veve ufiert ae fie di fâ la segretarie intal so studi legâl. Jê e à dit no parcè che e voleve fâ la camarele. Po dopo e à refudât ancje il puest fis intun locâl par lâ daûr di un cors di grafologjie. Il pari si jere imbesteât e la cuistion e jere finide in Tribunâl. Dopo trê grâts di judizi, ae fin al à vût reson il gjenitôr. (A.D.G.) – 30.05.2022.
