Animâi metûts in vendite a la aste a Pordenon, proteste dai animaliscj

Dopo il câs des protestis cuintri de sagre dal cunin di Manzan, i animaliscj a pontin il dêt cuintri dal Tribunâl di Pordenon.

Cheste volte, sot acuse al è il câs di bestiis metudis in vendite a la aste dal Tribunâl di Pordenon inte categorie “machinaris – imprescj di vore – materiis primis”. A son un cjaval, un pony, un bovin e cuatri cjavris sot impegnorament.

A contâ il fat e je stade la Oipa (Organizzazione internazionale protezione animali), che e vise che cheste procedure e je in contrast cu la normative che e tutele i animâi, tignint cont ancje dal articul 9 de Costituzion. La organizazion e domande cussì un cambi de rote: e volarès une modifiche de legjislazion che e blochi chestis proceduris par ducj i animâi. (a.d.g.) – 07.06.2024