Muarte une femine vuê di matine a Triest, daspò che si jere impiât un fûc tal so apartament. Il fat al è sucedût in viâl d’Annunzio al numar 79, tor des 7.40, cuant che cierts residents si son inacuarts dal fum che al lave fûr dal imobil e a àn visât il 112.
I Vigjii dal fûc a son rivâts cun dôs scuadris e la autoscjale. Jentrâts daurman tal apartament al cuint plan a àn studât lis flamis e a àn cjatât te cjamare di liet il cuarp di une femine, cuasi dal sigûr la proprietarie Susanna Lenhard di 77 agns. Pe conferme si spiete la conferme dal esam dal Dna.
Sul puest a son rivâts ancje i infermîrs dal 118 che a àn controlât il stât di salût di 13 personis che a son a stâ intal condomini, ma a stavin ducj ben. No si cognossin lis causis dal fûc e adun cui pompîrs a indaghin ancje la Polizie di Stât e la Polizie locâl, coordenâts de Procure de Republiche. (a.d.g.) – 18.05.2026
