Muart un olandês colât cul parecleve a Nimis

Un om di 64 agns di nazionalitât olandese al è muart vuê par vie des feridis une vore griviis vudis daspò jessi colât ju

L’alarme al è partît tor de une dopomisdì e a son stâts clamâts i tecnics de stazion di Udin dal Socors alpin e l’elisocors regjonâl. L’om si jere jevât di tiere de Mont Bernadie par dopo colâ parsore Torlan intun bosc une vore ert. In graciis des coordenadis dadis de Sores ai socoridôrs, i cuatri tecnics de stazion di Udin a son lâts ju cu lis cuardis de strade che si cjate parsore dal puest par plui di cent metris par rivâ indulà che al jere il cuarp che daspò al è stât tirât su dal elicotar dopo che il magjistrât di turni al veve dât il vie libare.

L’intervent al è finît tor des trê dopomisdì. (a.d.g.) – 17.04.2026