Il comandant dal Nucli radiomobile di S. Zorç di Noiâr de Vuardie di finance, Pier Paolo Marino, al è muart îr sore sere pôc dopo des 7 intun incident dilunc de strade ex provinciâl 3 inte localitât Maranut. L’uficiâl al jere suntun scooter vuidât di un so amì, che par causis sot investigazion al à pierdût il control dal mieç, lât a finîle intun cjamp.
In chel moment il trafic inte zone al jere fuart e i automobiliscj che a passavin a àn clamât daurman i socors. Sul puest a son rivâts une ambulance e l’elicotar adun cui pompîrs di Çarvignan e i carabinîrs de stazion di S. Zorç di Noiâr. Magari cussì no, par Marino nol jere plui nuie ce fâ, intant che il so amì, ferît in maniere grave, al è stât puartât cul elicotar intal ospedâl di Udin. (a.d.g.) – 17.06.2024
