Andrea Misson, di 21 agns, di Paulâr che al jere colât intun cantîr a Triest al è muart îr vie pe gnot ital ospedâl di Cattinara indulà che al jere ricoverât dai 6 di Otubar. Il zovin, dipendent de dite cjargnele “Costruzioni Stream srl”, al jere in vore intune cjase in costruzion su la cueste cuant che al jere stât cjapat di un tubi che al stave pompant ciment e al jere lat jù di cinc metris, fat che i à provocât traumis une vore grivis a cjâf, toraç e adom. Sul puest a jerin rivâts i Vigjii dal fûc e il personâl dal 118 che lu vevin puartat cul elicotar tal ospedâl triestin indulà che il puar zovin al jere restât in come fintremai îr cuant che e je stade declarade la muart cerebrâl.
Fuart corot in dut il paîs cjargnel. Il sindic Marco Clama al à dit che “par dute la nestre comunitât e je une legnade, ancje parcè che la famee di chest zovin e jere par ben, e une vore presint. Andrea al jere un fantat une vore brâf, educât e un grant lavoradôr. La gnove de so muart nus à lassat ducj cul morâl par tiere”.
La Procure de Repubbliche di Triest e veve viert daurman un fassicul par sclarî il parcè di chest enesim e dramatic incident sul lavôr. (a.d.g.) – 16.10.2025
