Dute la comunitât di Maian e je in corot pe muart dal piçul Francesco, il frutin di 14 mês, fi di Ilario Tommasini e Elisa Forte, che al è mancjât vie pe gnot tra lunis e martars passâts tal ospedâl di Udin.
Fintremai domenie il piçul al gjoldeve di buine salût. E je rivade une fiere improvise e il fat che nol veve fam al à metût in pinsîr i gjenitôrs. Daspò di une prime visite tal Pront socors di S. Denêl, Francesco al è stât puartat cun urgjence a Udin, indulà che magari cussì no il so curisin al à fermât di bati tor de une di gnot.
La famee cumò e je in spiete dai aciertaments clinics par sclarî lis causis de tragjedie. Il pari Ilario, za zuiadôr e alenadôr di sucès e la mari Elisa, campionesse cul Villaorba feminin, a son une vore cognossûts tal ambient dal rugby in Friûl e tal Venit.
La sindiche di Maian, Elisa De Sabbata, e à pandût a non di dute la comunitât vicinance e corot ae famee: “La muart incomprensibil di un frutin – e à dit De Sabbata – e à batût ducj noaltris”. (a.d.g.) – 18.03.2026
