Monossit di carboni, la mascare cul ossigjen e salve une siore malade

Un om di Tresesin che si è sintût mâl al à scuviert li dal pront socors che al jere intosseât dal monossit di carboni, tant che al veve bisugne di lâ inte cjamare iperbariche dal ospedâl di Triest. La fuide di monossit e jere in cjase sô in vie Miotti e cussì al è partît daurman l’alarme par salvâ la sô femine.

Sul puest a son rivâts i Vigjii dal fûc adun cun carabinîrs e infermîrs, ma la siore di 67 agns e stave ben in graciis dal fat che e doprave une mascare cul ossigjen. La siore dut câs e je stade puartade in ospedâl par fâ un control. (a.d.g.) – 11.02.2025