La setemane passade e je stade mandade cu la pueste al municipi di Udin une letare plene di menacis di muart cuintri dal vicesindic Alessandro Venanzi e dal assessôr ai lavôrs publics Ivano Marchiol.
La letare no je la prime a rivâ a Palaç D’Aronco. A son stadis almancul trê tai ultins mês chês rivadis che a son stadis daurman denunziadis aes fuarcis dal ordin.
“No volin creâ alarmisims – al à dit Venanzi dilunc de conference stampe inmaneade par rifleti su ce che al sta sucedint – ma a àn tirat dentri ancje me fie, tant plui che chê letare e veve peraulis pardabon griviis”, al à visat l’aministradôr che al à domandât di sbassâ la vôs viodût il clime politic dai ultins mês”.
Tra i bersais de letare ancje Marchiol, che al è stât invidât a meti su un gjac antiproietil tant che il coleghe Venanzi: “Nissun si lasse intimidî e tant mancul al fasarà un pas indaûr “ al à dit Marchiol ae presince di ducj i components de zonte comunâl. Ancje l’assessôr Chiara Dazzan e à denunziât di vê ricevût un an indaûr une letare che e veve peraulis violentis cuintri di je, ancje pal fat di jessi femine. (a.d.g.) – 10.11.2025
