Ancje inte nestre regjon e je stade firmade une ordenance par sospindi il lavôr inte oris indulà che il soreli al bat di plui. Cheste gnove ondade di cjalt african che e sta scjafoiant il Friûl – magari cussì no aromai no si pues nancje plui fevelâ di fat ecezionâl parcè che tai ultins agns lis temperaduris vie pal Istât a son simpri plui altis – e sta fasint lâ sù il risi di mâi e di fadie par cui che al lavore sot dal soreli o in lûcs di lavôr indulà che lis temperaduris a son une vore altis.
Par chest e je za in vigôr la ordenance firmade vuê di matine dal president de Regjon Massimiliano Fedriga che e previôt la sospension dal lavôr di misdì e mieç e fintremai aes cuatri di dopomisdì intai cantîrs edilizis e stradâi, intes ativitâts florovivaistichis e agriculis e dentri dai ambients di lavôr che no vedin aiar condizionât o che a vedin avonde zîr di aiar.
“E je une ordenance scrite in pôc timp cul jutori des organizazions sindicâls -al à dit l’assessôr regjonâl ae Salût Riccardo Riccardi – denant de emergjence cjalt che al à fat deventâ necessari intervignî cun regulis claris a tutele dai lavoradôrs plui a risi pes temperaduris altis”. (a.d.g.) – 02.07.2025
