A son stadis une gnot e un matine di lavôr grant pai Vigjii dal fûc dal Friûl-Vignesie Julie daspò che al è rivât, come che al jere stât previodût, il maltimp tacant de sere di îr.
A son stâts plui di 60 i intervents intes ultimis 24 oris, pe plui part causâts dal aiaron.
La part plui grande dal lavôr a àn scugnût fâlu i pompîrs dal Comant di Pordenon che a son stâts clamâts par 23 intervents e chei dal Comant di Triest cun 26 intervents, cuasi simpri par cause di arbui e ramaçs colats a tiere o malsigûrs. Altris 10 missions a son stadis fatis dai Vigjii di Udin e dome un a Gurize che e je stade sparagnade dal timpat.
Ancjemò tal misdì di vuê a jerin in vore i pompîrs di Triest par meti in sigurece un arbul spacât in doi dal aiaron dilunc de strade bande Santa croce, dongje de strade costiere, tant che par podê lavorâ cence pericul pal trafic a je stade sierade la strade costiere Ss14. (a.d.g.) – 07.07.2025
