Mâl fatâl par un storic dirigjent de Udinês

Tragjedie, cheste matine, a Cicunins di Feagne. Lorenzo Toffolini, 65 agns, dirigjent storic de Udinês e ancjemò colaboradôr de societât blancje e nere, che par chê al è stât a lunc team manager, al à pierdût la vite, dopo di un mâl intant che al jere ae vuide de sô machine.
A notâ la sô veture, lade fûr strade, une ambulance in passaç inte zone. I sanitaris lu àn cjatât tal puest di vuide, in stât di incussience. Imediâts i socors, cuntune rianimazion che e je durade par plui o mancul 50 minûts. A supuart, la Sores e à inviât ancje une machine di emergjence mediche di Udin e une ambulance di Sant Denêl. Lis manovris cardiopolmonârs a son ladis indevant cul miedi fin ae rivade in pront socors dulà che, magari cussì no, Toffolini al è muart. (ADG) – 4.10.2022