L’ultin salût ae volontarie de Protezion civîl muarte a Çale di Prepot

A son stâts celebrâts intal Domo di Cividât i funerâi di Elena Lo Duca, 56 agns, coordenadore de Protezion civîl di Prepot e ancje Assistente Capo Coordenadore de Polizie di Stât di Cividât, muarte une setemane fa dopo jessi stade scliçade di un arbul colât intal fugaron svampât a Çale di Prepot. A compagnâ la bare a jerin i coleghis de Polizie di Stât e i volontaris de Protezion civîl, che a àn organizât il pichet par l’ultin salût fûr de glesie. Centenârs lis personis che a àn cjapât part ae funzion maestose, celebrade dal Vicjari dal Vescul di Udin, monsignôr Guido Genero. (A.I.) – 28.07.2022