L’om cjatât cence sintiments a Pordenon al è stât tirât sot di un pirate

La autopsie fate vuê di matine sul cuarp dal om cjatât cence sintiments dilunc de strade Opitergina a Pordenon e à sclarît che la vitime che e viveve intal Friûl Ocidentâl e je stade tirade sot di un veicul, che il so vuidadôr dopo si è slontanât cence judâ il puar om. L’esam al à scartât la ipotesi di un mâl, che tal principi si pensave al fos la cause, ancje par cause dal fat che l’om al veve tal sanc un tas di alcul une vore alt.

La muart e sarès sucedude vie pe sere dai 24 di Lui, cuant che personis che passavin di chês bandis tor des 10 e mieze, a vevin viodût il cuarp par tiere e a vevin clamât daurman il 112. L’om di 45 agns al jere stât puartât tal ospedâl di Pordenon indulà che al jere muart pôc dopo. (a.d.g.) – 04.08.2025