Il sec de Midune al è aromai tant grâf che l’anunziât bloc aes irigazions al è stât anticipât ae miezegnot di doman. Chest al vûl dî che, di vinars di matine, i cjamps di blave e soie che a ricevevin aghe dal flum a saran escludûts dal servizi. Lis culturis plurienâls – tant che broilis e ortaiis – a varan, invezit, ancjemò aghe, ma a oraris e turnazions al ribàs.
In principi si pensave di podê gjavâ des risiervis di Redone almancul fin a Madone di Avost, ma i numars reâi si son rivelâts piês di ogni prevision plui nere: di vuê, al comuniche il Consorzi di bonifiche Ciline Midune, l’invasi di Tramonç al è uficialmentri in secje. Dai fonts si pescje nome pantan. Si scuen, duncje, rimetisi dome ai trê metris cubis ogni secont di aghe che il torint ancjemò al traspuarte a val. (A.D.G.) -10.08.2022
