Lignan si pronte za pe Pasche di Mai

La Comission provinciâl pal ordin public e la sigurece si è dade dongje a Lignan, convocade dal prefet di Udin, Domenico Lione, in presince dal cuestôr Pasquale Antonio De Lorenzo, dal assessôr regjonâl pe sigurece Pierpaolo Roberti, dai rapresentants de polizie e di ducj chei che a son e a saran cjapâts dentri. La riunion si è concentrade ator de planificazion des misuris di prevenzion e di control pe interie stagjon turistiche. E in di chei events che a fasaran incressi il numar dai turiscj a Lignan, tacant de Pasche di Mai, che tai ultins agns e à puartât cetancj zovins dal forest in citât, provocant cualchi probleme di ordin public. Ma la atenzion e je ancje concentrade su ducj chei altris events che a puartin miârs di personis intun lûc che tai altris mês nol va di là di 7 mil abitants, dal radun nazionâl dai bersalîrs al conciert di Tiziano Ferro. (A.I.) – 11.03.2026