Un libri antîc une vore preseôs dal 1500, intitulât “Iacobi Sannazarii opera omnia latine scripta nuper edita…” al è stât tornât indaûr vuê di matine dai carabinîrs dal Nucli tutele patrimoni culturâl di Udin ae Biblioteche Glemonense ae presince dal sindic di Glemone Roberto Revelant e de diretore de biblioteche.
Chest libri al jere stât metût tal 2023 in vendite in linie suntune plateforme di cumierç eletronic tal 2023, par 200 euros di une cubie che e jere a stâ a Rome. Chest volum al jere sparît dopo dal taramot dal 1976 e si pense che al sedi stât cjapât su tra i rudinaçs dal edifici sdrumât. Il libri al jere stât vendût in Spagne a un citadin di Alicante che une volte contatât dai carabinîrs al à visat che nol saveve nuie de robarie e al à daurman tornât indaûr il libri, intant che la cubie romane che lu veve vendût i à tornât indaûr i bêçs. (a.d.g.) – 27.05.2025
