Dutis e dôs lis personis che a jerin acusadis di omicidi colpôs pe muart de piçule Penelope, la frutine di 7 agns restade sot di une pile de aghe sante dentri de glesie di S. Clare a Udin che si cjate intal educandât Uccellis.
La Cort di Apel di Triest a al à sfrancjât des acusis sedi il predi e insegnant di religjon Ioan Marginean Cocis, sedi la dirigjente Anna Maria Zilli, ribaltant il verdet di prin grât tal câs dal predi che al jere stât condanât a 2 agns e 4 mês e confermât la assoluzion de dirigjente.
“A son stâts acetâts i motîfs dal apel – al à comentât il difensôr di pre Ioan, l’avocat Massimo Zanetti – che a mostravin che la glesie e je part dal edifici scolastic, che il fat di doprâle nol jere mai stât neât a Ioan e che nissun, nancje dilunc dai lavôrs di restaur, al veve mai considerât la pile de aghe sante un pericul”. L’avocat al à ancje dit che pre Ioan al reste dongje ae famee di Penelope pal dolôr che cheste tragjedie e à provocât.
La mari de frute, Laura Libanetti si è invezit sfogade: ”Pe Justizie taliane nissun al è responsabil pe muart di me fie. NO le vevi lassade di bessole dilunc de autostrade, ma dentri di une scuele e no je plui tornade a cjase”. La mari de frute e à definît vergognose la decision e e spere intun ricors in Cassazion de bande de Procure, ancje parcè che la famee no si è costituide part civîl e e à sielzût il procès civîl pal risarciment dai dams. (a.d.g.) – 27.05.2026
