Trê ativitâts economichis sospindudis e multis par cuasi 60 mil euros. Al è il risultât dai controi fats dal Nucleo Ispettorato Carabinieri del Lavoro di Udin, in colaborazion cu lis Compagniis di Udin, Palme e Tisane.
Lis verifichis a àn rivuardât aziendis agriculis, dal cumierç e dai servizis ae persone, par controlâ la assunzion regolâr dai lavoradôrs e il rispiet des normis di sigurece, salût e igjiene.
A son stâts controlâts doi centris massaçs, une aziende agricule e une imprese comerciâl, individuadis dopo vê incrosât lis informazions des bancjis dâts, par un totâl di 17 lavoradôrs.
Ae aziende agricule, logade a Cjopris e Viscon, a son stadis dadis sanzions par 25.100 euros parcè che, dilunc des operazions di racuelte dai miluçs, a son stadis scuviertis violazions che a rivuardin la mancjade redazion dal document di valutazion dai pericui e il control sanitari pai dipendents.
Multis di 6.100 euros e sospension de ativitât, invezit, par un esercizi comerciâl e un centri massaçs, ducj i doi a Cjassà. E’ je stade cjatade la presince di lavoradoris ‘ in neri’, une assegnade ae vendite e une massazadore.
Sanzions par 19.500 euros e stop de ativitât, infin, par un centri massaçs a Tisane par violazions che a rivuardin i presidis antifûc e prin socors, e ancje la mancjade redazion dal document di valutazion dai pericui. (ADG) – 28.09.2022
