Tor des trê de gnot di vuê scognossûts a an assaltât il bancomat che si cjate tal centri comerciâl di vie Osoppo a Glemone. I delincuents a àn parât dentri dal esplosîf intal sportel automatic de Monte dei Paschi di Siena e lu àn fat tonâ. Tal stes moment al à sunât l’alarme inte centrâl de vigjilance noturne. I laris a àn cjapat i bêçs e a son scjampâts, ma cuasi dal sigûr che bêçs no podaran jessi doprâts parcè che maglâts di piture verde, molade dal sisteme antilari.
Sul puest a son rivâts i carabinîrs dal Nucli Radiomobile di Tumieç e ancje i sanitaris dal 118 tal câs che cualchidun si fos fat mâl. Lis investigazions a son fatis dal Nucli investigatîf dai carabinîrs di Tumieç e dai coleghis di Glemone. Il ton al à impiât un fûc e fat une vore di dams ae struture par vie dal fum, ridusûts in graciis ae rivade dai pompîrs. (a.d.g.) – 03.07.2025
