La “Tessitura Carnica” e torne a nassi dopo il fûc dal 2020

E jentre intal circuit des “Buteghis artesanis de Cjargne” la sede storiche di Vile di Cjargne de “Tessitura Carnica”, semidistrute di un fûc la gnot dai 22 di Lui dal 2020. Carnia Industrial Park al à decidût di ristruturâ la fabriche, che po dopo e sarà cedude in fit cuntun bant. Al bant a podaran partecipâ impresis artesanis e/o artistichis impegnadis in ativitât di fabricazion, restaur, confezionament intai setôrs tessil, dal len, de cjarte, de ceramiche, dal veri, dal fier e – novitât di cheste edizion dal bant – ancje dal alimentâr. La gnove infrastruture, inte ale Sud dal edifici, e à l’obietîf di favorî e di rilançâ l‘artesanât tradizionâl locâl. (A.I.) – 13.03.2023