Il burlaç che de sere dai 10 di jugn al à batût il Friûl al à lassât cetantis sgrifadis sul teritori. La super cele passade parsore il plan e fintremai tes Vals dal Nadison e je stade compagnade di bugadis di aiar rivadis a 100 chilometris oraris e ancje tampieste.
Grivis i efiets cun desenis di intervents dai Vigjii dal fûc e dai volontaris de Protezion civîl che a àn lavorât dilunc dute la gnot par meti a puest lis robis.
Lis primis ploiis fuartis a son rivadis inte val dal But tal dopomisdì provocant inagaments a Zui e Darte. Cuant che il burlaç si è spostât bande dal plan a son rivâts inagaments a Basilian, Sedean e ancje a Pordenon. Lis bugadis dal aiaron a àn fiscât la vegjetazion un pôc par dut, tirant jù arbui di Stes e fintremai di S. Pieri dal Nadison, cun dentri Premariâs, Bertiûl, Buri, Cjampfuarmit., Listize, Morsan da lis Ocjis, Pavie, Puçui, Pradaman.
Dams ancje sui cuvierts a Cjamin dal Tiliment e a Doberdò del Lago, intant che la tante aghe colade e à tornât a fâ movi il teren dongje dal abitât di Cjaçâs di Tumieç.
Par fortune, in ducj i flums no son stâts regjistrâts problemis. (a.d.g.) – 11.06.2026
