“A son 30 fin a vuê i traspuarts partîts dal centri de Protezion civîl regjonâl di Palme cun bens di prime dibisugne e umanitaris pes popolazions ucrainis fiscadis dal conflit “. Lu à ricuardât il vicegovernadôr e assessôr cun deleghe ae Protezion civîl dal Friûl Vignesie Julie, Riccardo Riccardi.
“Intai ultins dîs, di Palme a son partîts doi camion cun 31 grandis tanichis che a contegnin ognidune 1.000 litris di licuit speciâl, di doprâ par studâ i fûcs impiâts dai bombardaments. La sostance e je stade donade di une societât taliane che e à concentrât il materiâl inte sede di Protezion civîl di Palme, restât aromai l’unic centri in Italie pe spedizion di aiûts umanitaris dal circuit che al fâs riferiment al Dipartiment nazionâl di Protezion civîl” al à sclarît Riccardi.
“Il prin convoi al è partît ai 8 di Març. Di alore, a son stâts 27 i mieçs pesants partîts di Palme, gjestîts de Protezion civîl dal Friûl Vignesie Julie pal traspuart, e trê convois feroviaris. Lis destinazions a son stadis chês dai hub di riferiment dai Paîs al confin cu la Ucraine: Polonie, Romanie e Slovachie. Di li il materiâl al ven puartât dopo dentri dal teritori de Ucraine”. (ADG) – 6.12.2022
