La procure di Udin e à viert un fassicul pe ipotesi di omicidi stradâl pal om di 35 agns Alessio Pines, di S. Zorç di Noiâr, che al jere ae vuide dal Fiat Doblò che îr di buinore al à cjapât sot e copât a Prissinins Alice Morsanutto di 17 agns, intant che e stave traviersant la strade par cjapâ la coriere e lâ a scuele.
Il procuradôr cjâf Massimo Lia al à comunicât che tai prossimis dîs e sarà fate la autopsie sul cuarp de puare fantate: “Al è un at dovût – al à dit il procuradôr – daspò di un incident mortâl indulà che e je muarte une zovine”.
Vuê di matine, tal curtîl dal liceu artistic Sello di Zardin grant a Udin, lis ativitâts si son fermadis par visâ cuntun minût di cidin Alice de classe 4 H, che no je plui, tra la comozion di passe 260 students. Cui compagns de fantate ancje chei altris students des altris sezions dal Sello e ancje chei des sedis distacadis dal liceu che tal stes timp si son fermâts. (a.d.g.) – 10.10.2025
