La plui antighe glesie di Udin e torne a vierzi

La plêf di Sante Marie in Cjistiel, la prime e plui antighe glesie di Udin, su la rive dal cuel dal cjistiel, e torne a dâ acet a fedêi e visitadôrs. Lis puartis a tornaran a vierzi domenie ai 5 cuntun gnûf sflandôr, daspò de benedizion de bande dal arcivescul Riccardo Lamba e prime de procession cu la crôs de Glesie mari di Aquilee e cualchi altre crôs des plêfs storichis dal Friûl e des parochiis de citât di Udin. I lavôrs di restaur a son stâts luncs e complicâts, ancje pai tancj frescs di epochis diferentis. La glesie che si viôt al dì di vuê e je dal decim secont secul, ma prime di che al jere un edifici plui antîc, forsit dal otâf secul, in ete langobarde, clamât prime “plebs Utini”, la prime plêf de citât, e po dopo cul stes non di vuê “Sancte Marie de castro”. (A.I.) – 02.10.2025