La gnove Europe e tache ancje des nestris citâts

Cemût si pues definî, dome in trê peraulis, lis nestris citâts e i nestris paîs? Cuâi a son lis carateristichis che al varès di vê il spazi urban e la dimension sociâl là che o vivìn ogni dì? Daûr de Union Europeane, lis trê peraulis a varessin di jessi “biel, sostignibil, inclusîf”. Al è il sproc dal New European Bauhaus, il progjet culturâl pe Europe che e smire a fâ deventâ realtât il Green Deal, valorizant lis carateristichis dal teritori. Par capî ce che al è e cemût che si concretize, e je stade organizade une cunvigne vierte a ducj, “La città di Udine nel Nuovo Bauhaus Europeo”, joibe al 1n di Dicembar, intal Salon dal Cjistiel di Udin, aes 5.30 dopomisdì. Tra i esemplis concrets in regjon: il borc di Topolò e la aree ex Dormisch intal centri di Udin. (A.I.) – 30.11.2022