La gnot dai letôrs a Udin: un sucès

Une citât vivarose, plene di events e di spetatôrs, par cuatri dîs e à respirât la culture, mudantsi intun spazi grant e viert par lei, scoltâ e condividi. La decime tierce edizion de “Gnot dai letôrs”, che di joibe ai fint a domenie ai 7 e à animât lis stradis, lis piacis, lis librariis, lis bibliotechis, i museus e i parcs de citât, si è sierade cuntun risultât plui che bon. I passe sessante events programâts, cuntun centenâr di ospits, a son stâts ducj plens, confermant il leam fuart jenfri il public e la fieste: un event che al ufrìs cetantis oportunitâts par incuintris, discussions e dialics jenfri letôrs e protagoniscj de culture contemporanie. Inmaneade dal Comun di Udin sot la direzion artistiche di Martina Delpiccolo, il festival al à dedicât cheste edizion al teme de “cure”, tratât fin dal prin event, chel di Gian Antonio Stella. Dut câs, la fieste no je ancjemò finide dal dut. Di Martars ai 9 e fint a vinars ai 12, si va indevant cun cuatri events vierts al public, in ocasion de otave conference nazionâl de Associazion Taliane de Storie Publiche. Si fevelarà di taramots, ricostruzions, fotografiis, di Tina Modotti e cetant di plui. (A.I.) – 08.06.2026