Cumò che la ploie e je finide, i doi muarts a Breçan a son stâts cjatâts, cualchidun al spiete ancjemò di tornâ a cjase, tai paîs sdrumâts dal brut timp di domenie di gnot e di lunis di buinore si è scomençât a contâ i dams e si stime che a sedin milions di euros. Lis cjasis a son coladis jù o jempladis di pantan, une vite di ricuarts a son stâts pierdûts e soredut lis aziendis a son in crisi. Une des primis a contâ ce che al jere sucedût e je stade la innomenade coghe “cu la stele Michelin” Antonia Klugmann, che e à viodût il so ristorant “All’argine” a Vencò là sot une altre volte, intune gnot di pôre, dopo vê vût za tornâ a fâ sù une part des cjamaris dal puest par colpe di une altre inondazion. Il sglavin nol à sparagnât altris ambients e edificis, par esempli un lûc storic di produzion, il “Molino Tuzzi” a Dolegne dal Cuei, fondât tal 1894 e l’unic mulin artesanâl che al funzionave ancjemò vuê tal teritori jenfri Gurize e la Slovenie. Cjapât sot di aghe, pantan e ruvinis, l’edifici storic al à vût cetant grancj dams cun pierditis che no si rive ancjemò a calcolâ e che a àn metût a risi la stesse aziende . (AL.) – 19.11.2025
62
