Une altre muart dilunc des nestris stradis, e ancjemò une volte a pierdi la vite un zovin. L’incident che te buinore aes 6 e mieze di joibe ai 9 di Otubar al à copât la studentesse Alice Morsanutto, intant che e stave lant a cjapâ la coriere par lâ a scuele li dal Sello di Udin, al à puartât cetant sconfuart.
Di ce che si sa, la fantate di 17 agns e stave traviersant a pît vie Edomondo Brian sul passaç pedonâl par lâ li de fermade, cuant che un furgoncin Fiat Doblò vuidât di un om di 35 agns, che al rivave di Palaçûl le à cjapade in plen, tant che il mieç, di là dal cluc sul tapon dal motôr, al à il veri denant dut rot. Sul puest a son rivâts i sanitaris dal 118, i Vigjii dal fûc e i carabinîrs. A son tacadis daurman lis manovris par rianimâ la fantate, ma magari cussì no, par Alice nol jere plui nuie ce fâ parcè che lis feridis a jerin masse griviis.
La violence dal impat e je stade cussì fuarte che robe de vitime e je stade cjatade a cetancj metris di distance dal lûc dal invistiment, intant che i residents a son saltâts fûr daurman par viodi ce che al jere sucedût. (a.d.g) – 09.10.2025
