Îr sore sere intal stabiliment de Acciaierie Venete di Buie un cjâf turni di trente agns che al è a stâ a Maian al è stât cjapât in plen di une stangje di fier a pene jessude fûr de fondarie. L’om al è stât puartat tal ospedâl di Padue, tal centri specializât pai ustionâts. La Procure di Udin e à metût sot secuestri il machinari e la fabriche cumò e je sierade.
“Chest al è il tierç infortuni in pôc timp – e vise la Fiom-Cgil – un fat che no si pues acetâ e che al da cetancj pinsîrs pe sigurece sul lavôr dai operaris dentri dal stabiliment. In segn di proteste e par confermâ la impuartance de sigurece sul lavôr cumò il stabiliment al è blocât. Al è stât declarât il siopar su ducj i turnis inte zornade di vuê. La Fiom-Cgil di Udin, adun cu la Rsu, e pretint garanziis adatis pe sigurece di ducj i lavoradôrs”. (a.d.g.) – 03.04.2025
