Infortuni sul lavôr a Dimplan a cuote 900 metris, indulà che un boscadôr di 55 agns, resident dal puest, intant che al stave taiant arbui tal bosc Faeit, al è stât cjapât sot di un ramaç une vore pesant. L’om al à patît un traume cranic, ridusût par fortune dal casc di sigurece e al è restât simpri cussient.
Daspò de clamade tor lis 10 di matine, sul puest a son rivâts daurman i oms de Vuardie di finance, dal Socors alpin e i sanitaris cul elisocors regjonâl. La scuadre dai socoridôrs e je lade ju’ par 50 metris cu la binte dal elicotar dopo che i coleghis dal ferît a vevin netât il puest par judâ la rivade dal socors.
Il ferît al è stât cjamât suntune barele e puartât intun lûc mancul ert e plui adat par jessi tirât su’ tal elicotar. Dopo altris curis li dal cjamp base, il boscadôr ferît al è stât puartât simpri cul elicotar intal ospedâl di Udin. (a.d.g.) – 09.04.24
