Individuât il zovin che al à doprât il spray urticant suntun autobus

da Alessandro Di Giusto

Al è stât cjatât dai carabinîrs il zovin che, îr di sere a Pordenon, al à doprât il nebulizadôr al pevaroncin dentri di un autobus de Atap, costrenzint l’autist a fermâ il mieç e a clamâ i socors: al è un marochin che di pôc al à fat i 18 agns. La bulade i è costade la denunzie par interuzion di servizi public.

Intal mieç, che di Pordenon al jere diret a Puart, a jerin presintis 25 personis, lavoradôrs e students.

In vie Mestre l’autist al à fermât la coriere, ativant daurman lis proceduris di sigurece. Lis tantis tossudis dai passizîrs, cun cualchidun che fintremai al faseve fadie a respirâ, a fasevin pensâ che cualchidun, forsit cence rindisi cont des consecuencis, al ves doprât un nebulizadôr urticant.

Sul puest a son rivâts i mieçs di socors: ambulance, machine di emergjence mediche e Vuardiis dal fûc, plui tart a son rivâts i carabinîrs de Radiomobile di Pordenon. (a.d.g.) – 22.02.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui