Becât de Polizie un dai autôrs des ofesis razistis al portîr dal Milan a Udin

La Polizie di Stât di Udin, dilunc des investigazions tacadis daspò i episodis di razisim viers il portîr dal Milan Maignan, in graciis dal supuart dal moderni implant di video-vigjilance presint li dal Stadi, e à individuât un prin om indiziât di vê berghelât insolencis razistis ripetudis tantis voltis. L’om, di cuarantesîs agns, de provincie di Udin, za cognossût aes fuarcis dal ordin, al è stât denunziât in stât di libertât ae Procure de Republiche di Udin, che e je daûr a coordenâ lis ativitâts di investigazion. Inte stesse suaze il Cuestôr di Udin al à mandât fûr intai siei confronts un Daspo pe durade di cinc agns. Lis ativitâts investigativis a van indevant par identificâ eventuâi altris sogjets responsabii di ats di discriminazion raziâl. (a.d.g.) – 22.01.2024