Brut incident cheste matine, aes 8, a Tumieç. Dilunc de strade regjonâl 52 bis, a pocje distance dal ospedâl citadin, doi auto si son dadis cuintri in maniere frontâl.
E son une Peugeot là che a viazavin un pari di 30 agns, e il so frut di pôc plui di un an, e une Fiat vuidade di une femine di 63 agns. Ducj a vivin a Tumieç.
Grâfs lis cundizions de femine: e je stade stabilizade, intubade e traspuartade in svol al ospedâl Sante Marie de Misericordie di Udin in codiç ros. L’om e il frut a son stâts traspuartâts in codiç zâl al ospedâl di Tumieç cu la ambulance. Il pari al à ripuartât lesions in plui parts dal cuarp, intant che il piçul al à patît lesions minôrs.
Sul puest pompîrs, personâl sanitari cuntune ambulance e l’elisocors, Polizie locâl pai rilêfs e agjents dal Comissariât de Polizie di Stât. Il trat de regjonâl dulà che al è sucedût l’incident al è restât sierât par dôs oris. (ADG) – 2.12.2022
