Incident mortâl dilunc de autostrade tra Vilès e Redipulie

Dilunc de autostrade A4, tra Vilès e Redipulie bande Triest, vuê tal dopomisdì, al è muart intun brut incident il vuidadôr di un furgon cun targhe bulgare che al à tamponât un Tir cun targhe cravuate.

Il bot al è stât pardabon fuart tant che il furgon al è lât a finî sot dal camion. L’autist al è muart sul colp. Sul puest il personâl dal 118, i Vigjii dal fûc che a àn lavorât par tant timp par taiâ lis lamieris intant che e jere stade ordenade la jessude obligatorie a Vilès pal trafic, il personâl di Autostrade Alto Adriatico e i agjents de Polizie stradâl che a stan investigant par capî la dinamiche dal incident. (a.d.g.) – 30.05.2025