Une femine di 33 agns e je stade cjapade sot intant che e stave traviersant la strade dilunc de strade Pontebane a Tresesin, inte sere sul tart di îr.
La vitime, Ekaterine Jajvani, citadine di origjin gjeorgjiane e resident a Reanuce di Reane dal Roiâl e je stade cjapade in plen de auto vuidade di un zovin di 26 agns: il bot al è stât cussì fuart di fâ svolâ la puare femine par une vore di metris, intant che la amie che si cjatave cun je si è salvade par cuistion di centimetris.
Sul puest a son rivâts daurman i sanitaris cuntune auto mediche e la ambulance, che a àn fat ducj i tentatîfs pussibii di rianimâ la femine, ma lis sôs feridis a jerin masse grivis. Ekaterine Jajvani e lasse un frutin di 5 agns. Il vuidadôr de auto al è cumò indagât par omicidi stradâl e i rilêfs a son stâts dâts ai carabinîrs. (a.d.g.) – 28.05.2026
