A stan za rivant a Lignan i prins turiscj austriacs par fa fieste dilunc dal fin de setemane dedicât ae Pentecostis. Cun di plui, domenie di sere li dal stadi Teghil al sarà ancje il conciert di Cesare Cremonini.
Par limitâ i problemis come che la cjoche fastidiose e cirî di tutelâ stradis e puescj publics di vuê di matine e je jentrade in vore la ordenance comunâl pandude par garantî a ducj un ambient seren, sigûr e net.
Lis regulis plui impuartantis a son dedicadis ae vendite e al bevi alcolics. Di cheste sere e fintremai a lunis ai 9 di Jugn i esercizis publics a varan di sierâ prime des dôs di gnot, intant che lis buteghis e i mini market a varan di sierâ prime de une. E sarà improibide la vendite di robe di bevi che si puedi puartâ vie e a saran multâts chei che si incjampin. De sere di vuê, par di plui, i Dj set a saran pussibii dome se a son stâts autorizâts e dut câs a varan di fermâsi ae miezegnot. Une deroghe fintremai de une di gnot e je permetude dome ai locâi che a àn implants acustics tarâts e personâl dedicât ae sigurece.
Des vot di sere al sarà improibît di lâ in aghe e de une di gnot no si podarà la su la splaze.
Come che e à visat la assessore aes Ativitâts produtivis e ae Polizie locâl, Liliana Portello, “la plui part di chestis regulis a son dome pe zone di Lignan. A Lignan Pinede e Lignan Riviere lis ativitâts a laran indenant cence improibizions particolârs”. (a.d.g.) – 06.06.25
