Al è stât necessari doprâ il secont elicotar sanitari dal Friûl-Vignesie Julie par fâ un intal prin dopomisdì a Sapade.
Ad alt, su la cueste Sud ocidentâl de Mont Plane, doi cjaçadôrs, un sapadin dal 1995 e un tumiecin dal 1969, si son cjatâts in dificoltât fuarte e no son rivâts plui a lâ indevant. I doi a jerin de matine in sorelûc intune aree cence trois e a son restâts blocâts intun trat tant ert cun crets instabii, nêf, teren glaçât e jerbe in posizion esposte.
A àn contatât in maniere direte i socoridôrs dal Socors alpin di Sapade che dopo al à alertât la Sores.
La operazion di recupar e je stade tant delicade parcè che i doi si cjatavin, a distance di cualchi metri l’un di chel altri, ducj i doi in posizions espostis e pericolosis. Un dai doi cjaçadôrs al jere aromai cence plui fuarces ancorât dome cuntun pît su di un cret instabil. (ADG) -7.12.2022
