In aghe vistîts a Monfalcon cuintri il sindic

A Marine Julia, domenie di matine, di 200 a 300 personis si son dadis cunvigne par fâ il bagn vistidis. Une forme di proteste inmaneade cuintri il sindic di Monfalcon, Annamaria Cisint, che intai dîs passâts si jere esprimude cuintri la pratiche de comunitât musulmane di fâ il bagn cui vistîts intor. La rispueste e je rivade cuntun “flash mob” in lît, durât par une ore. Citadins di ogni divignince, e di dutis lis etâts, a son jentrâts in mâr vistîts, par solidarietât. La sindiche Cisint e veve fevelât di “pratichis di dubie valence dal pont di viste dal contegn e de igjiene”, in plui che lesivis pal turisim, preanunziant un proviodiment par improibî l’acès al mâr cun vistiaris diviers dal costum. (A.I.) – 24.07.2023